রঘুবংশং সর্গ ০১

বাগর্থাবিব সংপৃক্তৌ বাগর্থপ্রতিপত্তয়ে |
জগতঃ পিতরৌ বন্দে পার্বতীপরমেশ্বরৌ || ১-১||
ক্ব সূর্যপ্রভবো বংশঃ ক্ব চাল্পবিষয়া মতিঃ |
তিতীর্ষুর্দুস্তরং মোহাদুডুপেনাস্মি সাগরম্ || ১-২||
মন্দঃ কবিয়শঃ প্রার্থী গমিষ্যাম্যুপহাস্যতাম্ |
প্রাংশুলভ্যে ফলে লোভাদুদ্বাহুরিব বামনঃ || ১-৩||
অথবা কৃতবাগ্দ্বারে বংশেঽস্মিন্পূর্বসূরিভিঃ |
মণৌ বজ্রসমুৎকীর্ণে সূত্রস্যেবাস্তি মে গতিঃ || ১-৪||
সোঽহমাজন্মশুদ্ধানামাফলোদয়কর্মণাম্ |
আসমুদ্রক্ষিতীশানামানাকরথবর্ত্মনাম্ || ১-৫||
যথাবিধিহুতাগ্নীনাং যথাকামার্চিতার্থিনাম্ |
যথাপরাধদণ্ডানাং যথাকালপ্রবোধিনাম্ || ১-৬||
ত্যাগায় সংভৃতার্থানাং সত্যায় মিতভাষিণাম্ |
যশসে বিজিগীষূণাং প্রজায়ৈ গৃহমেধিনাম্ || ১-৭||
শৈশবেঽভ্যস্তবিদ্যানাং যৌবনে বিষয়ৈষিণাম্ |
বার্দ্ধকে মুনিবৃত্তীনাং যোগেনান্তে তনুত্যজাম্ || ১-৮||
রঘূণামন্বয়ং বক্ষ্যে তনুবাগ্বিভবোঽপি সন্ |
তদ্গুণৈঃ কর্ণমাগত্য চাপলায় প্রচোদিতঃ || ১-৯||
তং সন্তঃ শ্রোতুমর্হন্তি সদসদ্ব্যক্তিহেতবঃ |
হেম্নঃ সংলক্ষ্যতে হ্যগ্নৌ বিশুদ্ধিঃ শ্যামিকাঽপি বা || ১-১০||
বৈবস্বতো মনুর্নাম মাননীয়ো মনীষিণাম্ |
আসীন্মহীক্ষিতামাদ্যঃ প্রণবশ্ছন্দসামিব || ১-১১||
তদন্বয়ে শুদ্ধিমতি প্রসূতঃ শুদ্ধিমত্তরঃ |
দিলীপ ইতি রাজেন্দুরিন্দুঃ ক্ষীরনিধাবিব || ১-১২||
ব্যূঢোরস্কো বৃষস্কন্ধঃ শালপ্রাংশুর্মহাভুজঃ |
আত্মকর্মক্ষমং দেহং ক্ষাত্রো ধর্ম ইবাশ্রিতঃ || ১-১৩||
সর্বাতিরিক্তসারেণ সর্বতেজোঽভিভাবিনা |
স্থিতঃ সর্বোন্নতেনোর্বীং ক্রান্ত্বা মেরুরিবাত্মনা || ১-১৪||
আকারসদৃশপ্রজ্ঞঃ প্রজ্ঞয়া সদৃশাগমঃ |
আগমৈঃ সদৃশারম্ভ আরম্ভসদৃশোদয়ঃ || ১-১৫||
ভীমকান্তৈর্নৃপগুণৈঃ স বভূবোপজীবিনাম্ |
অধৃষ্যশ্চাভিগম্যশ্চ যাদোরত্নৈরিবার্ণবঃ || ১-১৬||
রেখামাত্রমপি ক্ষুণ্ণাদা মনোর্বর্ত্মনঃ পরম্ |
ন ব্যতীয়ুঃ প্রজাস্তস্য নিয়ন্তুর্নেমিবৃত্তয়ঃ || ১-১৭||
প্রজানামেব ভূত্যর্থং স তাভ্যো বলিমগ্রহীৎ |
সহস্রগুণমুৎস্রষ্টুমাদত্তে হি রসং রবিঃ || ১-১৮||
সেনা পরিচ্ছদস্তস্য দ্বয়মেবার্থসাধনম্ |
শাস্ত্রেষ্বকুণ্ঠিতা বুদ্ধির্মৌর্বী ধনুষি চাততা || ১-১৯||
তস্য সংবৃতমন্ত্রস্য গূঢাকারেঙ্গিতস্য চ |
ফলানুমেয়াঃ প্রারম্ভাঃ সংস্কারাঃ প্রাক্তনা ইব || ১-২০||
জুগোপাত্মানমত্রস্তঃ ভেজে ধর্মমনাতুরঃ |
অগৃধ্নুরাদদে সোঽর্থমসক্তঃ সুখমন্বভূৎ || ১-২১||
জ্ঞানে মৌনং ক্ষমা শক্তৌ ত্যাগে শ্লাঘাবিপর্যয়ঃ |
গুণা গুণানুবন্ধিৎবাত্তস্য সপ্রসবা ইব || ১-২২||
অনাকৃষ্টস্য বিষয়ৈর্বিদ্যানাং পারদৃশ্বনঃ |
তস্য ধর্মরতেরাসীদ্বৃদ্ধৎবং জরসা বিনা || ১-২৩||
প্রজানাং বিনয়াধানাদ্রক্ষণাদ্ভরণাদপি |
স পিতা পিতরস্তাসাং কেবলং জন্মহেতবঃ || ১-২৪||
স্থিত্যৈ দণ্ডয়তো দণ্ড্যান্পরিণেতুঃ প্রসূতয়ে |
অপ্যর্থকামৌ তস্যাস্তাং ধর্ম এব মনীষিণঃ || ১-২৫||
দুদোহ গাং স যজ্ঞায় সস্যায় মঘবা দিবম্ |
সম্পদ্বিনিয়মেনোভৌ দধতুর্ভুবনদ্বয়ম্ || ১-২৬||
ন কিলানুনয়ুস্তস্য রাজানো রক্ষিতুর্যশঃ |
ব্যাবৃত্তা যৎপরস্বেভ্যঃ শ্রুতৌ তস্করতা স্থিতা || ১-২৭||
দ্বেষ্যোঽপি সম্মতঃ শিষ্টস্তস্যার্তস্য যথৌষধম্ |
ত্যাজ্যো দুষ্টঃ প্রিয়োঽপ্যাসীদঙ্গুলীবোরগক্ষতা || ১-২৮||
তং বেধা বিদধে নূনং মহাভূতসমাধিনা |
তথা হি সর্বে তস্যাসন্পরার্থৈকফলা গুণাঃ || ১-২৯||
স বেলাবপ্রবলয়াং পরিখীকৃতসাগরাম্ |
অনন্যশাসনামুর্বীং শশাসৈকপুরীমিব || ১-৩০||
তস্য দাক্ষিণ্যরূঢেন নাম্না মগধবংশজা |
পত্নী সুদক্ষিণেত্যাসীদধ্বরস্যেব দক্ষিণা || ১-৩১||
কলত্রবন্তমাত্মানমবরোধে মহত্যপি |
তয়া মেনে মনস্বিন্যা লক্ষ্ম্যা চ বসুধাধিপঃ || ১-৩২||
তস্যামাত্মানুরূপায়ামাত্মজন্মসমুৎসুকঃ |
বিলম্বিতফলৈঃ কালং স নিনায় মনোরথৈঃ || ১-৩৩||
সন্তানার্থায় বিধয়ে স্বভুজাদবতারিতা |
তেন ধূর্জগতো গুর্বী সচিবেষু নিচিক্ষিপে || ১-৩৪||
অথাভ্যর্চ বিধাতারং প্রয়তৌ পুত্রকাময়া |
তৌ দম্পতী বসিষ্ঠস্য গুরোর্জগ্মতুরাশ্রমম্ || ১-৩৫||
স্নিগ্ধগম্ভীরনির্ঘোষমেকং স্যন্দনমাশ্রিতৌ |
প্রাবৃষেণ্যং পয়োবাহং বিদ্যুদৈরাবতাবিব || ১-৩৬||
মা ভূদাশ্রমপীডেতি পরিমেয়পুরস্সরৌ |
অনুভাববিশেষাত্তু সেনাপরিবৃতাবিব || ১-৩৭||
সেব্যমানৌ সুখস্পর্শৈঃ শালনির্যাসগন্ধিভিঃ |
পুষ্পরেণূৎকিরৈর্বাতৈরাধূতবনরাজিভিঃ || ১-৩৮||
মনোভিরামাঃ শৃণ্বন্তৌ রথনেমিস্বনোন্মুখৈঃ |
ষড্জসংবাদিনীঃ কেকা দ্বিধা ভিন্নাঃ শিখণ্ডিভিঃ || ১-৩৯||
পরস্পরাক্ষিসাদৃশ্যমদূরোজ্ঝিতবর্ত্মসু |
মৃগদ্বন্দ্বেষু পশ্যন্তৌ স্যন্দনাবদ্ধদৃষ্টিষু || ১-৪০||
শ্রেণীবন্ধাদ্বিতন্বদ্ভিরস্তম্ভাং তোরণস্রজম্ |
সারসৈঃ কলনির্হ্রাদৈঃ ক্বচিদুন্নমিতাননৌ || ১-৪১||
পবনস্যানুকূলৎবাৎপ্রার্থনাসিদ্ধিশংসিনঃ |
রজোভিস্তুরগোৎকীর্ণৈরস্পৃষ্টালকবেষ্টনৌ || ১-৪২||
সরসীষ্বরবিন্দানাং বীচিবিক্ষোভশীতলম্ |
আমোদমুপজিঘ্রন্তৌ স্বনিঃশ্বাসানুকারিণম্ || ১-৪৩||
গ্রামেষ্বাত্মবিসৃষ্টেষু যূপচিহ্নেষু যজ্বনাম্ |
অমোঘাঃ প্রতিগৃহ্ণন্তাবর্ঘ্যানুপদমাশিষঃ || ১-৪৪||
হৈয়ঙ্গবীনমাদায় ঘোষবৃদ্ধানুপস্থিতান্ |
নামধেয়ানি পৃচ্ছন্তৌ বন্যানাং মার্গশাখিনাম্ || ১-৪৫||
কাপ্যভিখ্যা তয়োরাসীদ্ব্রজতোঃ শুদ্ধবেষয়োঃ |
হিমনির্মুক্তয়োর্যোগে চিত্রাচন্দ্রমসোরিব || ১-৪৬||
তত্তদ্ভূমিপতিঃ পত্ন্যৈ দর্শয়ন্প্রিয়দর্শনঃ |
অপি লঙ্ঘিতমধ্বানং বুবুধে ন বুধোপমঃ || ১-৪৭||
স দুষ্প্রাপয়শাঃ প্রাপদাশ্রমং শ্রান্তবাহনঃ |
সায়ং সংযমিনস্তস্য মহর্ষের্মহিষীসখঃ || ১-৪৮||
বনান্তরাদুপাবৃত্তৈঃ সমিৎকুশফলাহরৈঃ |
পূর্যমাণমদৃশ্যাগ্নিপ্রত্যুদ্যাত্যৈস্তপস্বিভিঃ || ১-৪৯||
আকীর্ণমৃষিপত্নীনামুটজদ্বাররোধিভিঃ |
অপত্যৈরিব নীবারভাগধেয়োচিতৈর্মৃগৈঃ || ১-৫০||
সেকান্তে মুনিকন্যাভিস্তৎক্ষণোজ্ঝিতবৃক্ষকম্ |
বিশ্বাসায় বিহঙ্গানামালবালাম্বুপায়িনম্ || ১-৫১||
আতপাত্যয়সংক্ষিপ্তনীবারাসু নিষাদিভিঃ |
মৃগৈর্বর্তিতরোমন্থমুটজাঙ্গনভূমিষু || ১-৫২||
অভ্যুত্থিতাগ্নিপিশুনৈরতিথীনাশ্রমোন্মুখান্ |
পুনানং পবনোদ্ধূতৈর্ধূমৈরাহুতিগন্ধিভিঃ || ১-৫৩||
অথ যন্তারমাদিশ্য ধুর্যান্বিশ্রাময়েতি সঃ |
তামবারোহয়ৎপত্নীং রথাদবততার চ || ১-৫৪||
তস্মৈ সভ্যাঃ সভার্যায় গোপ্ত্রে গুপ্ততমেন্দ্রিয়াঃ |
অর্হণামর্হতে চক্রুর্মুনয়ো নয়চক্ষুষে || ১-৫৫||
বিধেঃ সায়ন্তনস্যান্তে স দদর্শ তপোনিধিম্ |
অন্বাসিতমরুন্ধত্যা স্বাহয়েব হবির্ভুজম্ || ১-৫৬||
তয়োর্জগৃহতুঃ পাদান্রাজা রাজ্ঞী চ মাগধী |
তৌ গুরুর্গুরুপত্নী চ প্রীত্যা প্রতিননন্দতুঃ || ১-৫৭||
তমাতিথ্যক্রিয়াশান্তরথক্ষোভপরিশ্রমম্ |
পপ্রচ্ছ কুশলং রাজ্যে রাজ্যাশ্রমমুনিং মুনিঃ || ১-৫৮||
অথাথর্বনিধেস্তস্য বিজিতারিপুরঃ পুরঃ |
অর্থ্যামর্থপতির্বাচমাদদে বদতাং বরঃ || ১-৫৯||
উপপন্নং ননু শিবং সপ্তস্বঙ্গেষু যস্য মে |
দৈবীনাং মানুষীণাং চ প্রতিকর্তা ৎবমাপদাম্ || ১-৬০||
তব মন্ত্রকৃতো মন্ত্রৈর্দূরাৎপ্রশমিতারিভিঃ |
প্রত্যাদিশ্যন্ত ইব মে দৃষ্টলক্ষ্যভিদঃ শরাঃ || ১-৬১||
হবিরাবর্জিতং হোতস্ত্বয়া বিধিবদগ্নিষু |
বৃষ্টির্ভবতি সস্যানামবগ্রহবিশোষিণাম্ || ১-৬২||
পুরুষায়ুষ্যজীবিন্যো নিরাতঙ্কা নিরীতয়ঃ |
যন্মদীয়াঃ প্রজাস্তস্য হেতুস্ত্বদ্ব্রহ্মবর্চসম্ || ১-৬৩||
ৎবয়ৈবং চিন্ত্যমানস্য গুরুণা ব্রহ্ময়োনিনা |
সানুবন্ধাঃ কথং ন স্যুঃ সংপদো মে নিরাপদঃ || ১-৬৪||
কিন্তু বধ্বাং তবৈতস্যামদৃষ্টসদৃশপ্রজম্ |
ন মামবতি সদ্বীপা রত্নসূরপি মেদিনী || ১-৬৫||
নূনং মত্তঃ পরং বংশ্যাঃ পিণ্ডবিচ্ছেদদর্শিনঃ |
ন প্রকামভুজঃ শ্রাদ্ধে স্বধাসংগ্রহতৎপরাঃ || ১-৬৬||
মৎপরং দুর্লভং মৎবা নূনমাবর্জিতং ময়া |
পয়ঃ পূর্বৈঃ স্বনিঃশ্বাসৈঃ কবোষ্ণমুপভুজ্যতে || ১-৬৭||
সোঽহমিজ্যাবিশুদ্ধাত্মা প্রজালোপনিমীলিতঃ |
প্রকাশশ্চাপ্রকাশশ্চ লোকালোক ইবাচলঃ || ১-৬৮||
লোকান্তরসুখং পুণ্যং তপোদানসমুদ্ভবম্ |
সংততিঃ শুদ্ধবংশ্যা হি পরত্রেহ চ শর্মণে || ১-৬৯||
তয়া হীনং বিধাতর্মাং কথং পশ্যন্ন দূয়সে |
সিক্তং স্বয়মিব স্নেহাদ্বন্ধ্যমাশ্রমবৃক্ষকম্ || ১-৭০||
অসহ্যপীডং ভগবনৃণমন্ত্যমবেহি মে |
অরুন্তুদমিবালানমনির্বাণস্য দন্তিনঃ || ১-৭১||
তস্মান্মুচ্যে যথা তাত সংবিধাতুং তথার্হসি |
ইক্ষ্বাকূণাং দুরাপেঽর্থে ৎবদধীনা হি সিদ্ধয়ঃ || ১-৭২||
ইতি বিজ্ঞাপিতো রাজ্ঞা ধ্যানস্তিমিতলোচনঃ |
ক্ষণমাত্রমৃষিস্তস্থৌ সুপ্তমীন ইব হ্রদঃ || ১-৭৩||
সোঽপশ্যৎপ্রণিধানেন সন্ততেঃ স্তম্ভকারণম্ |
ভাবিতাত্মা ভুবো ভর্তুরথৈনং প্রত্যবোধয়ৎ || ১-৭৪||
পুরা শক্রমুপস্থায় তবোর্বীং প্রতি যাস্যতঃ |
আসীৎকল্পতরুচ্ছায়ামাশ্রিতা সুরভিঃ পথি || ১-৭৫||
ধর্মলোপভয়াদ্রাজ্ঞীমৃতুস্নাতামনুস্মরন্ |
প্রদক্ষিণক্রিয়ার্হায়াং তস্যাং ৎবং সাধু নাচরঃ || ১-৭৬||
অবজানাসি মাং যস্মাদতস্তে নাভবিষ্যতি |
মৎপ্রসূতিমনারাধ্য প্রজেতি ৎবাং শশাপ সা || ১-৭৭||
স শাপো ন ৎবয়া রাজন্ন চ সারথিনা শ্রুতঃ |
নদত্যাকাশগঙ্গায়াঃ স্রোতস্যুদ্দামদিগ্গজে || ১-৭৮||
ঈপ্সিতং তদবজ্ঞানাদ্বিদ্ধি সার্গলমাত্মনঃ |
প্রতিবধ্নাতি হি শ্রেয়ঃ পূজ্যপূজাব্যতিক্রমঃ || ১-৭৯||
হবিষে দীর্ঘসত্রস্য সা চেদানীং প্রচেতসঃ |
ভুজঙ্গপিহিতদ্বারং পাতালমধিতিষ্ঠতি || ১-৮০||
সুতাং তদীয়াং সুরভেঃ কৃৎবা প্রতিনিধিং শুচিঃ |
আরাধয় সপত্নীকঃ প্রীতা কামদুঘা হি সা || ১-৮১||
ইতি বাদিন এবাস্য হোতুরাহুতিসাধনম্ |
অনিন্দ্যা নংদিনী নাম ধেনুরাববৃতে বনাৎ || ১-৮২||
ললাটোদয়মাভুগ্নং পল্লবস্নিগ্ধপাটলা |
বিভ্রতী শ্বেতরোমাঙ্কং সন্ধ্যেব শশিনং নবম্ || ১-৮৩||
ভুবং কোষ্ণেন কুণ্ডোধ্নী মেধ্যেনাবভৃথাদপি |
প্রস্রবেণাভিবর্ষন্তী বৎসালোকপ্রবর্তিনা || ১-৮৪||
রজঃকণৈঃ খুরোদ্ধূতৈঃ স্পৃশদ্ভির্গাত্রমন্তিকাৎ |
তীর্থাভিষেকজাং শুদ্ধিমাদধানা মহীক্ষিতঃ || ১-৮৫||
তাং পুণ্যদর্শনাং দৃষ্ট্বা নিমিত্তজ্ঞস্তপোনিধিঃ |
যাজ্যমাশংসিতাবন্ধ্যপ্রার্থনং পুনরব্রবীৎ || ১-৮৬||
অদূরবর্তিনীং সিদ্ধিং রাজন্ বিগণয়াত্মনঃ |
উপস্থিতেয়ং কল্যাণী নাম্নি কীর্তিত এব যৎ || ১-৮৭||
বন্যবৃত্তিরিমাং শশ্বদাত্মানুগমনেন গাম্ |
বিদ্যামভ্যসনেনেব প্রসাদয়িতুমর্হসি || ১-৮৮||
প্রস্থিতায়াং প্রতিষ্ঠেথাঃ স্থিতায়াং স্থিতিমাচরেঃ |
নিষণ্ণায়াং নিষীদাস্যাং পীতাম্ভসি পিবেরপঃ || ১-৮৯||
বধূর্ভক্তিমতী চৈনামর্চিতামা তপোবনাৎ |
প্রয়তা প্রাতরন্বেতু সায়ং প্রত্যুদ্ব্রজেদপি || ১-৯০||
ইত্যাপ্রসাদাদস্যাস্ত্বং পরিচর্যাপরো ভব |
অবিঘ্নমস্তু তে স্থেয়াঃ পিতেব ধুরি পুত্রিণাম্ || ১-৯১||
তথেতি প্রতিজগ্রাহ প্রীতিমান্সপরিগ্রহঃ |
আদেশং দেশকালজ্ঞঃ শিষ্যঃ শাসিতুরানতঃ || ১-৯২||
অথ প্রদোষে দোষজ্ঞঃ সংবেশায় বিশাংপতিম্ |
সূনুঃ সূনৃতবাক্স্রষ্টুর্বিসসর্জোর্জিতশ্রিয়ম্ || ১-৯৩||
সত্যামপি তপঃসিদ্ধৌ নিয়মাপেক্ষয়া মুনিঃ |
কল্পবিৎকল্পয়ামাস বন্যামেবাস্য সংবিধাম্ || ১-৯৪||
নির্দিষ্টাং কুলপতিনা স পর্ণশালা-
মধ্যাস্য প্রয়তপরিগ্রহদ্বিতীয়ঃ |
তচ্ছিষ্যাধ্যননিবেদিতাবসানাং
সংবিষ্টঃ কুশশয়নে নিশাং নিনায় || ১-৯৫||